Членот на Советот на Народна банка, професор Синиша Наумовски, во интервју за бугарската телевизија НОВА, откри дека е оптимист за изнаоѓање решение од страна на премиерите на Македонија и Бугарија, додавајќи дека историјата треба да се остави на историчарите.

– Јас сум оптимист. Зоран Заев е многу искрена и добра личност. Мислам дека работите ќе се подобрат, верувам во неговата политика, јас не сум политичар, но верувам и во конструктивноста на опозицијата и шефот на државата и албанските партии. Мислам дека ќе можеме да најдеме решение. Бизнисот треба да оди напред. И туризмот, и врските – сè. Мислам дека Бугарија ќе згреши ако ги блокира разговорите на Македонија за ЕУ ​​во декември, бидејќи тоа ќе испрати лоши сигнали. Од друга страна, длабоко верувам во вашиот премиер, кого не го познавам лично, но имав средби со неговите министри, оптимист сум дека ќе најде решение, вели Наумовски.

На прашањето дали зад проблемот стои надворешно влијание, како руско или српско, Наумовски одговара дека во секој случај на надворешни сили им се прави услуга.

– Можеби несвесно им правите услуга на големите сили – нема да прецизирам дали станува збор за Русија или Србија. Ние во Македонија имаме теза што ја поддржувам – имаме носталгија за Југославија, а не за србоносталгија – ова е различно и сосема нормално. Овој период има свои позитивни страни, но има и негативни. Имате и вие слични периоди – но тоа е завршено. Го затворивме овој процес, станавме независна држава. Од 90-тите години на минатиот век, ние градиме пазарно-капиталистичко општество и ги следиме нашите главни цели. Татко ми беше еден од основачите на оваа посткомунистичка партија, сега Социјалдемократски сојуз и јас уште како дете знам како треба да гледаме на тоа – размислувањето од македонската страна е многу мирно и позитивно, вели Наумовски.

Тој заклучува дека не може да се запре целата нација да пишува на Фејсбук и социјалните мрежи, но додава дека тоа се маргинални нешта и мнозинството не поддржува говор на омраза.