Фудбалерите на Наполи, актуелниот шампион во Серија А се пласираа во финалето на италијанскиот Суперкуп откако во Ријад, Саудиска Арабија, ја совладаа Фиорентина со 3:0.

Наполи поведе во 22 минута со голот на Џовани Симеоне, додека Фиорентина пред крајот на првото полувреме (44`) не успеа да израмни од пенал преку Иконе.

Цело второ полувреме Наполи ја чуваше минималната предност, а во финишот сите дилеми ги реши 24-годишниот Алесио Ѕербин. Најпрвин одлично се снајде во 84 минута и по еден корнер од непосредна близина ја смести топката во противничката мрежа за 2:0, додека две минути подоцна одлично го заврши контранападот и упати прецизен удар во спротивниот агол од врвот на шеснаесетникот за конечни 3:0.

Интер и Лацио во петок ќе го одиграат вториот полуфинален натпревар, а воедно Интер е бранител на титулата откако лани го совлада Милан со убедливи 3:0. Финалето е закажано за понеделник.

Италијански Суперкуп, полуфинале:

Наполи – Фиорентина 3-0 (Симеоне 22`, Ѕербин 84`, 86`)