Најмалку 170 луѓе се повредени во судирите на каталонските сепаратисти и полицијата во близина на аеродромот во Барселона, соопштија денес каталонските власти.

Нереди избија за време на демонстрациите кои започнаа по пресудите за девет каталонски државници, кои добија од девет до 13 години затвор од Врховниот суд на Шпанија, поради нивната улога во референдумот за независност на Каталонија одржан во 2017 година.

Три особи се уапсени, а меѓу повредените има и 40 полицајци.

Вчера, илјадници луѓе излегоа на улиците, а потоа тргнаа да го блокираат аеродромот на повик на платформата „Демократско цунами“.

Откажани беа 110 летови, а управата на аеродромот соопшти дека протестите нема да влијаат врз денешниот распоред на летање.

Шпанската влада изминатите денови испрати полициско засилување и предупреди дека нема да се воздржува од користење на вонредни мерки за да ја осигури безбедност, вклучувајќи и суспендирање на автономијата на таа област, како што е направено во октомври 2017 година по обидот за сецесија.