„На точак“: Градските и општинските власти да ги чистат пешачките и велосипедските патеки подеднакво ревносно како што ги чистат коловозите

Со оставање на снегот на патеките се отежнува движењето на ранливите учесници во сообраќајот и се зголемуваат шансите да бидат удрени од моторните возила

Снегот кој утрово падна во Скопје им го отежна движењето на пешаците и на велосипедистите поради ненавременото чистење на снегот од пешачките и од велосипедските патеки на повеќе локации во главниот град.

Кога гледаме исчистени коловози, а пешачки и велосипедски патеки со снег, се прашуваме кое превозно средство го фаворизираат градските власти? Посебно кога се гледа дека не се чистат пешачките острови на локација на која секојдневно настрадуваат пешаци и велосипедисти поради возачи на коли кои не го почитуваат пешачкиот премин и семафорот. Со оставање на снегот на патеките се отежнува движењето на ранливите учесници во сообраќајот и се зголемуваат шансите да бидат удрени од моторните возила – велат од „На точак“.

Велосипедистите меѓу другото велат дека очекуваат градските и општинските власти да ги чистат пешачките и велосипедските патеки подеднакво ревносно како што ги чистат коловозите.

А ако сакаат да направат град безбеден за сите учесници, очекуваме дури и да ги исчистат патеките за пешаци и велосипедисти пред да ги исчистат коловозите – заклучуваат од „На точак“.

Видео на денот