На одмор преговорите за законот за попис
Пред два дена преставници на ВМРО-ДПМНЕ и Заводот за статистика имале нова средба за предлог-законот за попис со кој се предвидува наредната година да се спроведе попис на населението и на домаќинствата. Следната средба се договориле да биде на крајот на месецот.
Претставниците на Заводот за статистика велат дека средбата поминала во позитивна атмосфера, и дека очекуваат на следната, која треба да се случи на крајот на месецов, да се постигне и конечен договор за предлог-законот. На наредната средба се очекува да бидат присутни и преставници на сите парламентрани партии, за да може и тие да го искажат својот став. Таа би се одржала најрано на 28 август.
Од ВМРО-ДПМНЕ пак со поинаков впечаток.
– Разочарани сме од тоа што власта покажува неподготвеност да ги прифати нашите барања. Најголеми разидувања има околу транспарентноста на процесот и проширувањето на факторите за кои ќе се прибираат податоци – велат од ВМРО-ДПМНЕ.
ВМРО-ДПМНЕ на прес-конференција ги соопшти своите барања во врска со пописот минатиот месец. Меѓудругото, тие предлагаат и да се одложи пописот како и да се формира посебно тело кое ќе го води процесот, што не беше прифатливо за власта.