Тврдоглавиот милионер Лианг Ши (56) од Сечуан, се пожалил дека веќе 27 пати не успева да го положи приемниот испит на посакуваниот универзитет, пишува „Би-би-си“.

Поранешниот работник во фабрика, иако достигнал голем успех со својот бизнис во трговијата со градежен материјал, неостварена желба му била да заврши високо образование.

На последниот испит, тој успеал да освои 424 поени од максимални 750 поени, што е за 34 поени помалку од минималниот услов потребен за прием на факултет.

Во текот на оваа година, околу 13 милиони ученици се пријавија за приемните испити во Кина, но Лианг беше тој што го привлече вниманието на јавноста.

Тој уште од 1983 година се обидувал да го положи приемниот испит, но секогаш завршувал со неуспешни резултати.

„Си велев, верувам во себе дека ќе успеам, но по последниот пораз навистина сум разочаран. Жал ми е што не успеав затоа што желба ми беше да станам интелектуалец“, рекол бизнисменот.

На приемниот испит, познат како „гаокао“, кој е исклучително тежок, матурантите полагаат тестови по кинески јазик, математика, англиски јазик и наука.

Инаку, процесот на приемените испити на универзитетите во Кина е толку сериозен, што полицијата често се распоредува за да го одржува редот на патиштата и во ушилиштата.