Годината што ја испративме имаше, како и сите претходни, свои подеми и падови. Ќе ја паметиме, меѓу другото, по заминувањето на многу познати личности кои одбележаа една ера и го сменија лицето на популарната култура. Кралицата на рокот Тина Тарнер, поп-ѕвездата Шинејд О’Конор, филмските диви Ракел Велч и Џина Лолобриџида се само дел од тие големи имиња, а „Вог“ потсетува и на иконите на модната сцена со кои исто така се збогувавме во претходната година, пишува „Поликтика“.

Татјана Патиц

Веќе на почетокот на 2023 година, на 11 јануари, светот загуби еден од оригиналните супермодели, Татјана Патиц. Вест која скрши многу срца.

Познатата германска манекенка која уште од првите чекори на пистата ја следеше ликот на мистериозна ледена кралица, беше член на големата петорка на насловната страница на „Вог“ во 1990 година, а ја паметиме и од култното видео за песната „Freedom“ на Џорџ Мајкл.

Таа имаше сосема поинакво педигре од нејзините колешки Синди, Линда, Наоми и Кристи, изгледаше префинето, елегантно и, како што забележа Ана Винтур по веста за нејзината смрт, отсекогаш била симбол на европскиот шик. Кариерата ја започна во Париз, а првата соработка со легендарниот фотограф Питер Линдберг, во 1985 година, ја однесе до ѕвездите.

Неколку стотици насловни страници, кампањи за сите престижни модни куќи, гламур, слава… А потоа решила сето тоа да го замени за мирен живот и ранч во Калифорнија. Убавицата, чиј став и чудесни очи зрачеле со дискретно заведување, ненаметливост, некој старомоден гламур, дури и срамежливост, почина од рак на дојка на 56-годишна возраст.

Пако Рабан

Тој тврдеше дека живеел неколку животи, дека го познавал Исус и го видел Бог три пати, дека го посетувале вонземјани, дека го убил Тутанкамон, дека има душа стара 75.000 години, дека е забрзувач на времето… Користел неконвенционални материјали како метал, хартија или пластика, неговиот дизајн беше необичен, импресивен, светкав, понекогаш дури и научна фантастика – само сетете се на познатиот костим што Џејн Фонда го носеше како Барбарела.

Франциско Рабанеда Куерво, роден во 1934 година во баскискиот регион во Шпанија, ги заинтригира генерациите со радикалната визија за модата со допир на архитектура, по која дипломирал, но и со необични ставови за животот воопшто.

Големиот иноватор се пензионираше во 1999 година, кога нашироко важеше за персона нон грата во модната индустрија. Сепак, тој остана, и ќе остане постојан извор на инспирација, а парфемите со неговиот потпис продолжуваат да живеат.

Џејн Биркин

Во јули се простивме од друго божество на 20 век, Џејн Биркин. Нејзиното име засекогаш ќе остане синоним за неконвенционален стил, природен изглед и ноншалантен, боемски шик, бидејќи нејзиното влијание е трајно и ги надминува сите модни граници.

Иконата на една ера им покажа на жените дека можат да бидат слободни и невоздржани, дека треба да се чувствуваат добро во своја кожа и да излезат од традиционалните рамки што им ги наметнува конзервативното општество.

Да не го заборавиме и култниот додаток, кој го носи нејзиното име. Веќе знаете на што мислиме. Бидејќи една е Биркин – чанта, другите се само чанти. Француската актерка и пејачка родена во Англија со години не се разделувала од плетената корпа што ја купила во Португалија. И тогаш, при случајна средба во авион со директорот на куќата Хермес пред речиси четири децении, се родила идејата за совршена чанта, денес најскапа на светот, за која познатите дами не жалат да дадат цело богатство.

Сестраната уметница беше и актерка во историска љубовна приказна. Бурната романса со францускиот шансониер Серж Генсбур беше крунисана со контроверзниот дует „Je t’aime“, и ќерката Шарлот, денес почитувана актерка.

Биркин зад себе остави и бројни совети за среќен живот. За крај на приказната ќе издвоиме една: продолжете да се смеете, тоа ќе ве направи барем десет години помлади.