Македонскиот народен театар со претставата „Лагата“ учествува на 31. Фестивал на камерен театар „Ристо Шишков“ во Струмица. Претставата е работена според текст на актуелниот француски писател Флоријан Зелер, во режија на Бесфорт Идризи, а играат Јордан Симонов, Габриела Петрушевска, Оливер Митковски и Драгана Левенска.

„Лагата“ е текст што говори за тоа колку можеме да бидеме искрени, особено во интимните односи, односно кога, колку и дали воопшто е дозволено да се лаже. Иако при прв контакт со текстот, може да се добие впечаток дека негова главна тема е брачниот однос или неверството, сепак, како што и самиот наслов навестува, всушност, тоа со што се занимава текстот, а воедно и претставата, е лагата како феномен.

Претставата „Лагата“ ќе биде изведена на 12 септември, со почеток во 20 часот, на сцената во театарот „Антон Панов“ во Струмица, а ќе биде посветена во чест на сценографот, долгогодишен соработник и, пред сѐ, голем пријател на МНТ – Крсте С. Џидров.

– Џиби, како што го нарекувавме во театарскиот свет, од 1984 до 2022 година е автор на сценографии за 12 (дванаесет) претстави во МНТ, а токму претставата „Лагата“ е негова последна сценографска креација во овој театар – известија од РСМ НУ Македонски народен театар.