Министерство за економија: Од годинава концесионерите ќе плаќаат повисоки надоместоци
Неповолни реакции во јавноста предизвика сознанието колкав е вкупниот износ што го собира државата од концесионерите. Според анализата што вчера ја објави Центарот за граѓански комуникации, 264 фирми на кои им се издадени 358 концесии, вкупно, во 2019 година платиле концесиски надоместоци од 8,2 милиони евра. Според дел од комнтарите, државата недомаќински управува со националното богатство, овозможувајќи им на поединци, од него да профитираат.
На прашањето од „Слободен печат“ каков е ставот на Министерството за економија во чија надлежност се концесиите, а во врска со ваквите реакции во јавноста, оттаму одговорија дека од годинава ќе има повисоки цени за концесионерите.
– Владата на Република Северна Македонија во 2020 година донесе нов Тарифник, односно направи зголемување на износите на концесиските надоместоци преку Тарифникот за утврдување на висината на надоместоците за издавање на дозволи и концесии за вршење на детални геолошки истражувања и концесии за експлоатација на минерални суровини (“Службен весник на Република Македонија“бр.24/2020) и тој се применува од 01.01.2021 година – велат од Министерството за економија.