Македонската таеквондистка Мила Рељиќ од Таеквондо Клубот „Тигри Скопје“ оствари извонреден спортски успех на меѓународниот натпревар Винер Израел Опен од Г2 серијата на меѓународните светски натпревари. Нашата натпреварувачка успеа изминатиот викенд да се закити со златото во конкуренција сениорки -62 килограми.

На натпреварот учествуваа повеќе од 270 натпреварувачи од 25 земји во светот меѓу кои и САД, Кореја, Индија, Бразил, Шпанија, Германија, Велика Британија, итн.

Во својата категорија Рељиќ во борбата за златениот медал ги победи и репрезентативката на Израел, Наама Биненсток а во финалната борба со доминација ја победи и бронзената од последните Панамерикански Игри, претставничката од Еквадор, Мел Мина.

Ова е прв златен медал за 19 годишната Мила, која по освоениот бронзен медал во Загреб во јуни месец годинава ја докажа својата светска класа.

Тренерот на Мила, Александар Ефтимов најавува и нови успеси, претстојат Европското Клупско првенство од 22-26 август во Талин, Естонија, Европското првенство за млади до 21 година кое ќе биде крајот на месец септември во Албанија, а надежите се и за успех на Светското првенство во ноември месец во Мексико.