Во првиот сет добро започнавме со водство од 6:3, но брзо се возвратија противниците кои не само што израмнија на 8:8, потоа и го контролираа резултатот во своја корист. Постепено беа во позитива кој достигна и до највисоки „плус седум“ (13:20) и не ни дозволија да се вратиме.

Можевме да стигнеме до израмнување во вториот сет во кој воглавно ние бевме во предност, имавме 8:4, па 10:6, играчите на Јошко Миленкоски ги израдуваа навивачите во арената и со водство од 13:7.

Бевме навистина блиску до 1:1 во сетови бидејќи на семафорот стоеше и 20:14 за нас и наместо рутински да се одработи задачата до крај, дозволивме ривалот да направи пресврт. Најпрвин гостите стигнаа до 20:18, па повторно бевме на „плус три“ (22:19). При 22:20 Украинците врзаа три поени во серија за 22:23, а при 24:24 реализираа уште два за зголемување на 0:2 во сетови.

Украинските одбојкари во третиот сет ни покажаа како треба да се одржува позитива, водеа со 2:6, па со 9:14, ние на моменти се доближувавме до „минус два“ (14:16, 17:19). Дојдовме и до 19:20, но Украина на секаков начин доаѓаше до решение, се одвои на 20:24 и тука сите дилеми околу победникот беа решени.

Во македонската репрезентација најефикасен беше Н. Ѓоргиев со 15 поени, следен од А. Љафтов со 11, а на спротивната страна Олех Плотнитскиј запиша 14 поени.

Европска златна лига
Група „Б“

6. коло, резултати –

Македонија – Украина 0:3 (18:25, 24:26, 23:25)
Хрватска – Белгија 3:1 (25:22, 25:20, 23:25, 25:21)

Конечна табела:
1. Украина (18:0) 18 бодови
2. Белгија (8:13) 6
3. Хрватска (9:15) 6
4. Македонија (8:15) 6