Ковачевски ќе учествува на Самитот на НАТО во Литванија
Премиерот Димитар Ковачевски утре и задутре ќе учествува и ќе ја предводи делегацијата на Северна Македонија на Самитот на НАТО Алијансата, во Вилнус, Литванија. Од прес-службата на Владата информираат дека во состав на владината делегација се министерот за надворешни работи, Бујар Османи и министерката за одбрана, Славјанка Петровска.
Ковачевски ќе учествува на состаноците на шефови на држави и Влади членки на Северноатлантскиот совет, и поканетите шефови на држави и Влади на партнерски земји Австралија, Грузија, Јапонија, Република Кореја, Нов Зеланд како и претседателите на Европскиот совет и Европската комисија. На Самитот е предвидено да учествува и претседателот на Украина Володимир Зеленски – се наведува во соопштението.
Ургентните безбедносни предизвици се главна тема на самитот, а во фокус на состаноците на лидерите на Северноатлантскиот совет предвидено е да биде зајакнувањето на поддршката за Украина и зајакнувањето на врската на НАТО со Украина преку формирање на Советот НАТО-Украина.
Во рамки на учеството на Самитот на НАТО, предвидено е претседателот на Владата, Ковачевски да оствари билатерални средби со премиерката на Естонија Каја Калас и премиерот на Грција Киријакос Мицотакис. Во програмата се предвидени и неформални состаноци на министрите за одбрана и надворешни работи на кои ќе учествуваат и министерот за надворешни работи Бујар Османи и министерката за одбрана Славјанка Петровска – најавија од Владата.
Премиерот ќе биде придружуван од сопругата Елена Ковачевска. Таа, како што велат од прес-службата на Владата ќе има свои активности во рамки на програмата за сопружници во организација на Првата дама на Литванија, г-ѓа Дијана Науседа.
Сопругата на претседателот на Владата, г-ѓа Ковачевска ќе го посети Центарот за деца и жени бегалци од војната во Украина, каде ќе се сретне со Првата дама на Украина г-ѓа Олена Зеленска. Во рамки на посетата, г-ѓа Ковачевска ќе присуствува и на настани посветени на литванската култура и уметност – се вели во соопштението.