Коронавирусот го одложува наредното коло во Серија А
Премиерот на Италија, Џузепе Конте најави дека сите натпревари од наредното 26.коло од Серија А можат да бидат одложени поради коронавирусот,а неизвесен е и настапот на Интер во Лигата на Европа.
Вчера во Серија А се одиграа само два натпревари, додека четири беа одложени поради коронавирусот кој пристигна во Италија. Премиерот Конте изјави дека најверојатно сите натпревари од 26. коло во Серија А ќе бидат одложени.
– Мислам дека за само една недела нема да можеме да се справиме со инфекцијата толку многу за да можеме да продолжиме со спортски настани. Ќе го следиме развојот на болеста и ќе ја процениме можноста за одложување на сите натпревари следната недела – изјави Конте.
Најавата на италијанскиот премиер не се однесува само за натпреварите во Сериј А, туку во опасност е и реванш натпреварот во Лигата на Европа помеѓу Интер и Лудогорец кој треба да се игра в четврток.
