Пред Основниот граѓански суд во Скопје денеска треба да се одржи прво рочиште по тужбата против Боречката федерација по основ на „дискриминација врз основа на род и пол”.

Според тужителите, улога во која се јавуваат полицискиот боречки клуб „Безбедност” и полицискиот клуб за боречки спортови „7 Мај-Тигар” од Скопје, Боречката федерација на Република Северна Македонија во повеќе наврати и во подолг временски период флагрантно го крши Уставот, Законот за заштита од дискриминација и Законот за еднакви можности на жените и мажите, бидејќи врши директна дискриминација врз основа на пол и род.

– Жртва на дискриминаторските дејствија со кои нееднакво се постапува, се женските борачки. Женските членови на боречките клубови се дискриминирани на повеќе начини, првично нивните активности не се во целост регулирани со подзаконски акти на ниво на Федерацијата, во одредени категории не се формирани женски репрезентации, по завршување на натпреварите, на машките учесници им се доделуваат медали и сертификати, додека пак на женските учеснички само сертфикати, наведуваат тужителите.

Од таа причина двата боречки клуба, преку Македонското здружение на млади правници поднесоа претставка до Комисијата за заштита од дискриминација, која постапи по истата и донесе Општа Препорака бр. 0801-152/3 од ден 21.06.2019 година со која се потврди постоење на дискриминаторски дејствија извршени од страна на Федерацијата.

– Согласно, законските одредби од областа на заштите од дискриминација, жените и мажите треба да имаат еднакво учество во сите области на јавниот и приватниот сектор, еднаков статус и третман во остварување на сите пpава и во развојот на нивните индивидуални потенцијали преку кои тие придонесуваат во општествениот развој, како и еднакви придобивки од резултати од произлезени од тој развој. Комисијата за спречување и заштита од дискриминација смета дека во конкретнито случај има основ за дискриминација во областа на родовите права, тврдат тужителите.