Кикс на Челси, Барнли дојде до бод во Лондон
Лидерот на табелата во Премиер лигата, Челси направи кикс во 11 коло играјќи пред своите гледачи само 1:1 против Барнли, кој се наоѓа во долниот дел од табелата.
И покрај ремито кое доаѓа по четирите победи по ред, „сините“ останаа лидери на табелата со 26 бодови, три повеќе од Манчестер сити, а четири повеќе од Ливерпул кој има наптревар помалку.
Фудбалерите на Челси доминираа на „Стемфорд бриџ“, упатија дури 25 удари, имаа околу 70 проценти посед на топката, но не успеаја да слават.
„Сините“ поведоа во 33 минута кога Каи Хаверц го искористи додавањето од Рис Џејмс. Казната за промашувањата на фудбалерите на домашниот тим дојде во 80 минута кога Џеј Родригез му асистираше на Матеј Видра кој без проблеми го совлада Менди и креираше големо изненадување.
Фудбалерите на Норич дури во 11 коло ја остварија првата победа во Премиер лигата откако со 2:1 го совладаа Брентфорд. Норман му донесе водство на Норич во шестата минута, а Тему Пуки во 29 минута зголеми на 2:0. Гостите во второто полувреме успеаја да го намалат резултатот преку Рико Хенри.
Кристал Палас продолжува со добрите резултати и по победата над Сити во минатото коло, сега со 2:0 го совлада Вулверхемтпн. Двата гола беа постигнати во финишот од натпреварот, Вилфред Заха во 61 минута го отвори резултатот, а дилемите околу победникот ги решо Конор Галагер во 78 минута.