Новиот роман за деца и млади „Капут од мов“ од наградуваниот српски писател Стефан Тиќми својата промоција ја имаше во книжарницата „Литература.мк“ во Скопје.

Оваа модерна бајка, која на македонски јазик е во издание на „Либи“, дел од „Арс Ламина – публикации“, ја промовираа уредничката Оливера Ќорвезироска и литературниот и историски теоретичар Ермис Лафазановски. Преводот е на Дејан Василевски.

Промоторката Ќорвезироска истакна дека романот, иако е, пред сѐ, наменет за деца, сепак е книга и за возрасни, односно за чувствителни. Таа ги спореди делата на Тиќми со „Малиот принц“, „Галебот Џонатан Ливингстон“ и со романите на Игор Коларов. „Капут од мов“ е поетски роман за созревањето, за осаменоста, за уметноста, за љубовта и за природата како лек против најразличните проблеми на современиот човек заглавен во односите со другите, но и со себеси. Во него има и магичен реализам и епска фантастика и бајковитост, но најмногу од сè го има разгранетиот талент на Тиќми.

Авторот Тиќми истакна дека главната порака на „Капут од мов“ е дека уметноста може да биде спас од тешката реалност. „Често се навраќам на разговорите на Хорхе Луис Борхес и Ернесто Сабато, кои споменуваат еден експеримент, во кој човек кој штотуку заспива, постојано го буди некој. Нивната теорија е дека на крајот, човекот, кој постојано го скорнува некој (и не му дозволуваат да заспие и да сонува) може да полуди. Така и со уметноста. Соништата (изразени преку уметноста) постојат за да можеме да ја преживееме реалноста“, рече Тиќми.

(Текстот е објавен во „Културен печат“ број 155, во печатеното издание на весникот „Слободен печат“ на 19-20 ноември 2022)