Кафето во кафуле, а особено во туристичките места, очигледно стана вистински луксуз. Уште ако нарачате и сок или одлучите да јадете, бидете подготвени за голем трошок. Сè поголемо е незадоволството кај граѓаните и туристите кои се жалат на превисоките цени во туристичките места во регионот.

Неколку туристи од Германија неодамна порачале дека цените во Хрватска се доста повисоки од претходните години и дека платиле околу 700 куни (93 евра) за ручек за четиричлено семејство во Задар, пишува „24сата“.

Последниот таков пример доаѓа од кафуле во Опатија, Хрватска. Разочараниот гостин на својот фејсбук-профил објавил сметка од кафуле во Опатија, бидејќи смета дека платил премногу за она што го нарачал.

Тој нарачал кроасан со шунка и сирење, мало макијато и природен сок од лимон.

Сè заедно платил – 107 куни (околу 14 евра).

Кроасанот го платил 30 (околу 4 евра), макијато 32 (4,26 евра), а сок дури 45 куни (5,8 евра).

Луѓето најмногу ги изненадило тоа што кафето чинело повеќе од кроасанот, па под објавата на гостинот оставиле куп коментари, повеќето згрозени од високите цени.