Проширувањето на ЕУ до 2025 година не е реално и штетно е што Западниот Балкан се преправа дека спроведува реформи, а ЕУ дека тие се спроведени, изјави поранешниот заменик на помошникот државен секретар на САД за Европа и Евроазија Брајан Хојт Ји.

– Нема потреба да се откажува од евроинтеграциите, но важно е да се биде искрен какви се изгледите на тој пат. Затоа што преправањето дека тоа е извесно и оти некои земји можат да станат членки до 2025 година, не само што им одмага на оние кои треба да спроведуваат реформи, туку ги охрабрува и клептократите, корумпираните функционери да им велат на луѓето дека членството ќе се случи за две, три, пет години и им дава повеќе кислород отколку што заслужуваат, рече Ји на собирот „Решавање на нерешливото на Западен Балкан“ во Вашингтон.

Тој додаде дека меѓународната заедница моментално нема јасна стратегија за Западен Балкан и оти ЕУ и САД на регионот не му го придаваат значењето кое би требало, како и дека е важно ЕУ и САД да имаат единствен пристап.

– Исто така мораме да знаеме дека ако не реагираме веднаш – работите ќе станат многу полоши, заклучи Ји.

Во врска со состанокот на претседателот на Србија Александар Вучиќ и косовскиот претседател Хашим Тачи во Берлин на 29 април со германската канцеларка Ангела Меркел и францускиот претседател Емануел Макрон, Ји рече дека не е пресуден за дијалогот меѓу Белград и Приштина, но е прилика за разговор.

Според него, „историските книги“ за Балканот се полни со моменти „сега или никогаш“, но состанокот во Берлин не е еден од нив, иако е прилика.