Во Националниот центар за контрола на отрови на Воено-медицинската академија во Белград (ВМА) деновиве се примени десет пациенти со симптоми на труење со отровни печурки, пренесуваат српските медиуми. Осуммина од нив се во тешка состојба.

Како што соопштија од ВМА, пациентите печурките ги набавиле од неовластен продавач и ги консумирале, не знаејќи дека се отровни.

Полицијата во Шабац ја уапсила 72-годишната М.Г.(72) поради сомнение дека таа им ги продала отровните печурки на затруението, на пазарот во Шабац.

Осомничената е во 48-часовен притвор и ќе биде сослушана во Основното јавно обвинителство во Шабац. Полицијата запленила и одредена количина печурки, кои ќе бидат анализирани.

Од ВМА предупредуваат дека од оваа пролет во Националниот центар за контрола на отрови биле лекувани 26 пациенти со труење од печурки. Меѓу нив имало и една бремена жена, но за среќа сѐ поминало без посериозни последици. Српските лекари апелираат до граѓаните да се воздржат од собирање и јадење шумски печурки, бидејќи земјата влегува во период на обилни врнежи, кога се очекуваат повеќе печурки во природата, а тогаш станува и полесно да се измешаат печурките што се јадат со отровните.