Дијана Иваноска со својот талент за комбинација на вкусови нè носи на едно исклучително гастрономско патување. Иваноска стои зад инстаграм-профилот „Dash of Spice“ и ни ги открива малите тајни за создавање магија од вкусови. Своите рецепти почнала да ги споделува со своите следбеници и пријатели од почетокот на пандемијата.

„Го сакам секој дел од процесот, но најмногу уживам во фотографирањето на храната“, ни открива Дијана.

Инвентивната Дијана денеска споделува рецепт за едно гастрономско уживање – галета со кајсии.

Состојки:
За кората:

– 150 грама многу ладен путер исечкан на коцки
– 300 грама брашно
– 3 лажици шеќер
– прстофат сол
– 75 милилитри ладна вода
– 1 јајце за премачкување
– Крупен кафеав шеќер за поросување

Фил:

Околу 6 кајсии зависи од големината. Треба да се покрие средината на кората со кајсии.
– 1 лажица нишесте
– 1 лажиче ванила екстракт
– 2 лажици шеќер (ако сакате поблаго, ставете и повеќе)

Подготовка:

Во подлабок сад ставете ги брашното, шеќерот и солта и измешајте. Додајте го ладниот путер и тријте го со брашното додека добиете ронлива смеса. Додајте ја водата и замесете тесто. Треба да биде меко и да не се лепи за рацете. Тестото поделете го на два дела. Завиткајте со проѕирна фолија и оставете во фрижидер барем еден час.

Кајсиите исечкајте ги на тенки парчиња. Додајте ги шеќерот, ванилата, нишестето и измешајте полека.
Загрејте ја рерната на 180 степени Целзиусови.

Развлечете го тестото во круг до дебелина 4-5 мм. Редете ги кајсиите во средината на кората оставајќи околу 4- 5 см од краевите. Свиткајте ги краевите тесто преку кајсиите. Премачкајте ги краевите од кората со матено јајце. Поросете шеќер на краевите.

Печете 35-40 минути.

Уживајте!