Искршени и расклатени плочки, подна фонтана која не работи цела година, искршени делови на фонтаната „Воин на коњ“, таква е сликата на плоштадот „Македонија“ во последните година дена.

И плоштадот „Филип Втори“, од другата страна на Вардар преку Камен Мост по нецели десетина години од неговото уредување е запуштен, со расклатени и дел искршени плочки, а просторот пред објектот на Министерството за транспорт и врски, остана непоплочен и откако заврши реновирањето на зградата на ова министерство.

За тоталната негрижа за она во што се вложени милиони евра никој не одговара ниту се чувствува надлежен. Како инаку, Град Скопје и Општина Центар може да дозволат двата плоштади да се наоѓаат во ваква очајна состојба?

Колку за потсетување, сите гости од странство, кои секако сакаме да ги привлечеме во нашиот град, прво нешто што посетуваат е градскиот плоштад и плоштадот „Филип Втори“, преку кој всушност се влегува во Старата чаршија. Недозволиво е нивното санирање и доведување во пристојна состојба на надлежните да им се на „крајот од умот“.