Филмологот и продуцент Владимир Ангелов е нов директор на Агенцијата за филм
Досегашниот директор на Кинотеката, Владимир Ангелов, е нов директор на Агенцијата за филм. Одлуката беше донесена на седница на Владата што се одржа на 6 февруари. Ангелов седум години беше директор на Кинотеката на Македонија, а на новата функција доаѓа откако му заврши мандатот на претходниот директор на Агенцијата за филм Бојан Лазаревски.
Ангелов е реномиран филмолог и продуцент. По дипломирањето на Факултетот за драмски уметности (ФДУ) во Скопје во 1992 година, кратко време работел како продуцент во „Вардар филм“. Во Кинотеката работи од 1995 година до денес.
Во 2017 година беше назначен за в.д. директор на Кинотеката, а директор стана на крајот на 2018 година. На почетокот на кариерата работи на рекогнисцирање и реставрација на македонскиот филмски фонд снимен во период од 1948 до 1953 година.
Врз основа на елаборатот за заштита на овој фонд, Кинотеката на Македонија ги изработува заштитните филмски копии на овие филмови. Во неговата биографија е наведено дека работи на проекти на аналогна и дигитална реставрација на македонски филмови како активност на Кинотеката.
Од 1997 година соработува со „Кинопис“, списание за историјата, теоријата и културата на филмот и на другите уметности. Член е на македонската секција на Меѓународната федерација на филмски критичари – ФИПРЕСЦИ.
Исто така, соработува со Македонската академија на науките и уметностите на проектот „Фотографијата и филмот на почвата на Македонија“.
(Текстот е објавен во „Културен печат“ број 217, во печатеното издание на весникот „Слободен печат“ на 10-11.02.2024)