Европската куќа на ракометот (ЕХФ) привремено го суспендираше Драган Начевски кој раководеше со судиската комисија.

ЕХФ со официјално соопштение ја објасни целата ситуација и суспензијата за поранешниот македонски судија, а сега делегат. Како главна причина за суспензијата на Начевски е претпазливост по објавата на данската „ТВ2“ за наводно учество во местење натпревари.

До ЕХФ била доставена документација со видео и аудио снимки од состанок на Начевски со бизнисмен кој тврдел дека може да донесе кинески тим во СЕХА лигата. На истиот состанок се споменува и договор за местење резултати.

Во своето соопштение ЕХФ наведува дека Начевски директно одбил нешто такво, но се потенцира дека не се дистанцирал доволно. Суспензијата е со цел да се зачува интегритетот на спортот додека се разгледаат доказите.

Претходно на почетокот на годината истата „ТВ2“ објави обвинувања за местење натпревари кон македонските судии Славе Николов и Ѓорѓи Начевски, ЕХФ тогаш застана позади своите арбитри и ги демантираше обвинувањата.

ЕХФ се огласи: Обвинувањата кон македонските судии се неосновани и без докази