На овогодинешниот Детски избор за песна на Евровизија, кој ќе се одржи во недела, на 24 ноември во Гливице, Полска, Македонија ќе ја претставува Мила Москов од Прилеп. Четиринаесетгодишната Мила ќе се претстави со песната „Fire“, а вчера ја имаше првата проба и се покажа одлично.

Во јули годинава, на аудицијата на која учествуваа 18 кандидати, комисијата едногласно ја избра Мила Москов, оценувајќи дека „има најдобар настап, поседува извонредни пејачки способности и достојно ќе ја претставува Република Македонија“.

„Од најрана возраст Мила покажува интерес кон музиката и на шест години се запишува во локалното државно музичко училиште во Прилеп на одделот за пијано, но по две години се префрла на соло пеење, каде и ги прави своите први почетоци во пеењето. На 11 години се пријавува на аудиција за мали таленти каде што влегува во финалето, со што ѝ се зголемил интересот за пеењето. Во 2017 година се запишува во приватното музичко училиште „Матрикс“ во Прилеп. Мила во 2017 година учествуваше на фестивалот „Мелфест“ како дебитант“, наведуваат од Македонската радио телевизија.

На првата проба Мила помина одлично. Во продолжение погледнете го видеото од пробата.