Денот на македонскиот јазик во Романија со фокус на поезијата на Ацо Шопов беше одбележан во Букурешт
Во Националниот музеј на романската литература во Букурешт, со пригодна програма на 7 декември беше одбележан Денот на македонскиот јазик во Романија, во организација на Лекторатот по македонски јазик во Букурешт и Амбасадата на РС Македонија во Романија.
Во фокусот на настанот беше одбележувањето на стогодишнината од раѓањето на македонскиот поет Ацо Шопов, а во негова чест студентите кои го изучуваат македонскиот јазик читаа негова поезија на македонски, на романски и на англиски јазик. Поетот Филип Димкоски изведе поетски перформанс со стиховите од познатата песна на Шопов, „Небиднина“, а беше прочитана и поезија на Димкоски, на македонски и на романски јазик.
Вршителот на должност Муарем Меџити од Амбасадата на РС Македонија во Романија, ја истакна важноста од развивањето на културно-општествените релации меѓу овие две држави.
– Во склоп на оваа програма ја одбележувме стогодишнината од раѓањето на македонскиот поет Ацо Шопов, еден од великаните на нашето книжевно творештво, како и 80-годишнината од раѓањето на Никита Станеску, великан на романската литература. Македонија и Романија се две пријателски земји кои споделуваат заеднички вредности. Со Романија споделуваме богата заедничка историја и извонредна традиција, а сето тоа им дава суштина и вредност на длабоките врски меѓу нашите народи – изјави Меџити.
Денот на македонскиот јазик е определен со Декретот на претседателот на Романија, Клаус Вернер Јоханис уште во 2018 година. Како што наведе лекторката по македонски јазик на Факултетот за странски јазици и литература во Букурешт, Елена Ѓорѓиовска – оттогаш, македонскиот јазик станува мост кој уште повеќе ги спојува македонската и романската културна заедница, зацврстувајќи ги односите меѓу двете земји и покажувајќи дека правото на славење на мајчиниот јазик и култура е право кое зближува и ја обогатува меѓусебната културна размена.
– Датумот на славење, 8 Декември е поврзан со денот кога Македонската православна црква го одбележува својот патрон св. Климент Охридски – Чудотворец и сметам дека не постои поубав датум за одбележување на овој ден, бидејќи од старословенскиот период, од св. Кирил и св. Методиј, преку св. Климент и св. Наум, погледите и дејноста на Пулевски, Крсте П. Мисирков, Прличев, Цепенков, Миладиновци, Рацин, до Блаже Конески и кодификацијата на македонскиот јазик во 1945 година, тој – македонскиот јазик дишел и дише низ времето и историјата, обидувајќи се како жив организам да се развива, да страда и да се радува заедно со народот и луѓето што го зборуваат – рече Ѓорѓиовска.
Таа изрази голема благодарност до Амбасадата на РС Македонија во Романија, Принцот Шербан Димитрие-Стурза, почесен конзул на РС Македонија во Констанца и претставништвото на „Алкалоид“ во Романија.
Врската меѓу македонската и романската книжевна сцена се зацврстува уште од 1982 година, со пријателството помеѓу Ацо Шопов и романскиот поет Никита Станеску, кој во истата година е добитник на Златниот венец на Струшките вечери на поезијата. Во чест на ова нивно пријателство, на пријателството помеѓу Шопов и Станеску, на пријателството меѓу Македонија и Романија во склоп на настанот се прочитаа и две песни од Никита Станеску во препев од романски на македонски јазик од Јане Теохаревски – историчар на уметност и голем афирматор на македонскиот јазик и култура во Романија.
– Ми беше огромна чест што заеднички успеавме да го органзираме овој настан, бидејќи независно дали сме дома или некаде по светот, мајчиниот јазик е она што сме ние, тој е нераскинлив дел од нашата свест. Тоа е јазикот на кој најгласно се смееме, јазикот на кој најсилно љубиме и најискрено тагуваме и јас не можам да бидам посреќна што тој јазик, мојот јазик имав можност да го прославам овде, во Романија заедно со драги луѓе кои го сакаат и почитуваат – истакна лекторката Ѓорѓиовска.
Во рамките на настанот беше реализирана презентација и дегустација на македонски вина и сирења од страна на „Слоу фуд Македонија“, која наиде на интерес и воодушевување од страна на присутните гости и претставници на амбасадите од повеќе држави од светот, известија од Лекторатот за македонски јазик во Букурешт.