Најочекуваната игра за 2020 година е конечно тука. Кога Мајк Пондсмит ја пишувал првата „Cyberpunk“ игра во 80-тите години на минатиот век, тој не бил свесен дека ќе предвиди толку многу работи поврзани со иднината.

„Од компјутерски софтвер до директна комуникација и масовна корпоративна контрола, сето тоа го имаме денес… Единственото нешто што го немаме се летачки автомобили, што е навистина она на што се надевав. Но, ние имаме страшни работи во „Cyberpunk“ што се случуваат и во реалниот свет и затоа мислам дека жанрот е повторно популарен и денес“, вели Пондсмит.

„Cyberpunk 2077“ е успешна реализација и проекција на светот во иднината, каде што човекот и технологијата се влеваат во едно.

Овој проект на полската компанија/студио „CD Projekt RED” се бележи како едно од најамбициозните дела во мулти-билионската индустрија на игрите. Моментално покрај сето тоа што се случува во светот, ја имаме привилегијата да кажеме дека живееме во златната доба на гејмингот. Ова е обид и успех за постигнување нови нивоа во видео игрите кои досега изгледаа невозможни.

Мајк Пондсмит вели дека бил „прилично вклучен“ уште од почетокот на проектот, а главната улога му била да го задржи силниот реализам на неговата оригинална визија.

Оваа видео игра е приказна за една дистописка иднина која стана своевиден феномен уште пред да биде пуштена во продажба. Токму поради успешниот маркетинг, но и самиот стил на играта привлече големо внимание низ светот.

Па, како би изгледало ако играте вие? Која би била вашата мисија?

Играта почнува од дното на хиерархијата, а вашата цел е да се пробиете во општествтото на тој виртуален свет. Интересно е тоа што начинот како ќе го направите тоа – целосно зависи од вас.

Вие ја поседувате моќта на дијалозите и мисиите, вие ја контролирате приказната. Во Ноќниот град (локацијата каде што примарно се одвива дејството во играта) можете да наидете на секакви бизарни и неочекувани препреки и прашања кои понекогаш и немаат одговор.

Во една од главните улоги во играта може да го најдете и актерот Кијану Ривс, како Џони Силверхенд. Моралните вредности на припадниците на овој град се прилично „матни“, секој има своја цел и никој не ви е пријател.

Овој проект ни ја прикажува дигитализираната иднина во многу суреално светло, инспирирано од визијата на Подсмит и неговата идеја за „Cyberpunk“ универзумот.

Оваа игра е направена од истите луѓе кои стојат и зад популарната игра „The Witcher“ која беше инспирација и за наградуваната серија „The Witcher“ и токму тоа ги крена високите очекувања на светот за оваа игра.

Оваа практика продукцијата на „Netflix“ планира да ја продолжи и со „Cyberpunk 2077“ најавувајќи дека ќе направат аниме серија што ќе започне во 2022 година.

Но, оваа игра не е толку перфектна, се појавија и голем број на жалби и поплаки. Добротворната организација за епилептитичари повикаа да се направат измени во играта, покажувајќи загриженост дека делови од играта можат да предизвикаат фото-чувствителна епилепсија.

Многумина велат дека играта е преамбициозна, избрзана, играта на одредени моменти кочи, како и за целиот перформанс за кои продукцијата веќе се извини и вети дека ќе бидат регулирани наскоро.