Директорот на Регулаторна комисија за енергетика, Марко Бислимоски во вечерашното гостување во Тема на денот на Сител ТВ коментирајќи го инцидентот кој се случи пред два дена, рече дека е изненаден од самиот настан и дека досега закани кон него најчесто биле упатувани преку Фејсбук, но не им обрнувал внимание.

– Закани имаше по носењето на одлуката за намалување на цената на парното, добив закана „куршум за тебе“. Пријавена е таа, по фејсбук беше тоа и од прилика тоа било тоа. Немало некои закани, а и не сум ни обрнувал внимание и понатаму уште помалку ќе им обрнувам внимание, рече Бислимоски.
Тој додава и дека не се плаши воопшто и дека ќе продолжи со работата како и до сега.

– Сакам да истакнам дека не се плашам, дека ќе продолжам да работам како и до сега и она што ми е многу важно сакам да им се заблагодарам не само на пријателите што ми се јавуваат туку на обични луѓе коишто ме сретнаа овие два дена и ми дадоа поддршка да продолжам да работам како и до сега. И тоа е единствениот пат, кажа Бислимоски.

Претседателот на Регулаторната комисија за енергетика вечерва изјави дека како регулаторно тело ги презеле сите мерки за заштита на електроенергетскиот систем и дека постапката за одземање на лиценцата на „У пауер” е почната откако е добиен допис од МЕПСО за злоупотреба на балансираната енергија за комерцијални цели.

– Преземавме мерки за да го заштитиме електроенергетскиот систем. Кон таков чекор се одлучивме откако МЕПСО ни испрати допис и алармираше за „У пауер”. Во август и половина на септември биле користени овие резерви за комерцијални потреби, истакна Бислимоски.

Посочи дека доколку се злоупотребат резервите и наместо да се балансира системот, тие се користат за комерцијални цели, тогаш би бил загрозен енергетскиот сектор.