Заштитата на Друзите во Сирија и нивните права е приоритет за сириските власти, изјави денес сирискиот привремен претседател Ахмед ал-Шара.

Тој им се обрати на граѓаните по вчерашните израелски напади врз јужна Сирија и воздушните напади врз Дамаск, нагласувајќи дека отфрла секаков обид за вовлекување на Сирија во војна, пренесува Ројтерс.

„Ние не сме меѓу оние кои се плашат од војна. Цел живот се соочувавме со предизвици и го браневме нашиот народ, но ги ставивме интересите на сирискиот народ пред хаосот и уништувањето“, рече Ал-Шара.

Тој додаде дека сирискиот народ не се плаши од војна и е подготвен да се бори ако му биде загрозено достоинството.

Во врска со конфликтот во јужна Сирија, Израел претходно вчера нападна неколку цели во Дамаск, вклучувајќи ја и зградата на Министерството за одбрана, а според информациите од сириското Министерство за здравство, три лица се убиени, а 34 се ранети.

Друзите и Бедуините претходно три пати се согласија на прекин на огнот, но секој пат брзо го прекршуваа и продолжуваа со борбите во градот Свеида, каде што мнозинството од населението се Друзи, пренесува Танјуг.