Јавното претпријатие „Комуна” од Крушево денеска организираше акција за собирање отпадоци околу Крушевско Езеро, спортските игралишта и т.н. „корзо”.

Од јавното претпријатие информираат дека е собрана голема количина отпадоци и апелираат на одговорност и заедничка работа на заштита на животната средина.

– Детектиравме многу отпад особено околу Крушевско Езеро и спортските игралишта како места со најголема посетеност во Крушево. Исто така, добивме и пријави од граѓани за загаденост во овој предел и околу детското одморалиште. Ќе продолжиме со овие активности, но подеднакво е важно како граѓани да бидеме одговорни и секој од нас да придонесе за заштита на нашата околина и овие убави места во град Крушево, потенцираше в.д. директорката Станка Ефремова Трајкоска.

Од ЈП „Комуна” потсетуваат дека од декември 2020 година започна со кампања за подигнување на свеста за правилно складирање и исфрлање на отпадот од домаќинствата и на сите јавни површини.