Мекгрегор ги шокира фановите: Заминувам во пензија
Конор Мекгрегор ги шокираше своите фанови објавувајќи дека се повлекува од боречкиот свет. Најпопуларниот борец во УФЦ, одлуката ја објави на својот твитер-профил.
„Здраво момци, денеска одлучив да се повлечам од спортот кој е познат како „мешани боречки вештини“. На сите мои поранешни колеги им посакувам успех во натпреварувањето. Сега ќе им се приклучам на моите поранешни партнери кои се веќе во пензија. Прават пинаколада на моја сметка“, напиша Мекгрегор.
Ирецот последниот меч го имаше против Русинот Хабиб Нурмагомедов во октомври минатата година кога мораше да „тапка“ и да се предаде во четвртата рунда. Борбата имаше и второ полувреме кога Нурмагомедов го нападна спаринг-партнерот на Мекгрегор, Дилон Данис, кој беше во публиката.
Медиумите во САД се сомневаат дека ова е конечна одлука на ирскиот борец, тие потсетуваат дека Мекгрегор на сличен начин објави дека се повлекува од ММА и во 2016 година, еден месец по поразот од Нејт Диаз. Тој набрзо потоа се премисли, па дури истата година го имаше својот камбек во рингот.