Во Албанија денеска се одржуваат локалните избори со учество само на албанското мнозинство.

Процесот на гласање официјално започна утринава во 07:00 часот, а ќе трае до 19:00 часот, јавува БалканВеб.

Албанските граѓани ќе гласаат за избор на 61 градоначалник.

Локалните избори ги следат 150 набљудувачи на ОБСЕ/ОДИХР, како и мисиите на странските амбасади во Албанија.

За гарантирање на мирен изборен процес, Државната полиција ангажираше 7.779 полицајци.

Тоа што го карактеризираше почетокот на процесот на локалните избори се протестите на група поддржувачи на опозицијата пред неколку училишта во Тирана, кои брзо беа прекинати. Додека пак во Скадар, каде што градоначалникот е од редовите на опозицијата дел од училиштата каде што требаше да бидат сместени гласачките места се заклучени. Така што изборниот процес во Скадар не е започнат во сите избирачки места.

Опозицијата не е дел од денешните избори. Претседателот Илир Мета, го откажа овој датум како ден на изборите и издаде нов декрет за избори кои ќе се одржат на 13. октомври.

Право на глас имаат 3.536.015 албански државјани, од кои за првпат гласаат 132.788 лица. Според Министерството за внатрешни работи списокот на избирачи го сочинуваат 51% мажи и 49 % жени.
Од 61 општини, во 35 од нив има само по еден кандидат на трката.