Пред пет години, Пол Вилан отпатува во Москва на двонеделен одмор кој заврши во руски работен логор. Американецот ќе помине уште еден Божиќ во притвор, илјадници километри од дома. Американската влада вели дека тој е незаконски приведен и обвинет за шпионажа.

Но, во ретко интервју по телефон од неговиот далечен затвор, Пол Вилан за Би-Би-Си изјави дека се чувствува „напуштен“ од сопствената земја, која договори две размени на затвореници со Русија во последната година.

Одлуката да го остави зад себе тој ја нарече „сериозно предавство“.

Собирање на заложници

Коментарите на Вилан дојдоа додека американскиот новинар Еван Гершкович се подготвува за својата прва Нова година зад решетки под истото обвинение.

Неговиот весник, Волстрит журнал, и неговата влада се јасни во тоа дека случајот на Русија против него е лажен. Како акредитиран дописник, тој беше уапсен во март додека ја извршуваше својата работа.

Друг новинар, американско-руската државјанка Алсу Курмашева, беше приведена во октомври откако отпатува да се види со семејството. Таа се соочува со затворска казна до 15 години, под обвинение, вклучително и ширење „лажни вести“ за руската војска.

Пол Вилан е убедливо најдолго затворен од другите. Портпаролот на американската влада за Би-Би-Си изјави дека им дале „повеќе предлози“ на Русите и дека „постојано разговараат“ за случајот на Вилан со сојузниците. „Ниту една недела не поминува без интензивна активност“, се вели во соопштението.

Но, гневот кај Вилан расте.

„Знам дека САД имаат секакви предлози, но тоа не е она што го сакаат Русите. Затоа тие одат напред-назад, како да фрлаат шпагети во ѕид за да видат која ќе се залепи. Проблемот е во тоа што мојот живот се исцрпува додека тие го прават тоа. Поминаа пет години!“ вели тој.

По неговото судење, Вилан вели дека Русија сакала да го испрати дома во замена за осудениот трговец со оружје, Виктор Бут. Но, Доналд Трамп тогаш беше американски претседател и „постојано кажуваше не“.

Две години подоцна, Виктор Бут беше заменет за американската кошаркарска ѕвезда, Бритни Гринер, која се изјасни за виновна за поседување канистри со масло од канабис. Пол Вилан остана заборавен и осамен.

„Тоа е исклучително стресно да се знае дека можев да сум дома пред неколку години“, рече тој. „Крајно е фрустрирачки да се знае дека тие ги направиле овие грешки. Тие во основа ме напуштија овде“.

Вилан има и британски, ирски и канадски пасоши, а амбасадорите на сите четири земји го посетуваа, без посериозни обиди да го ослободат.

Приказната на Еван

Американскиот Стејт департмент нема да ги потврди деталите за чувствителните преговори со Русија. Но, портпаролот на американската влада го опиша секретарот Блинкен како „лично посветен“ да обезбеди ослободување на Вилан.

Се вели дека Русија одбила „неколку значајни понуди“, но дека САД „нема да престанат со овие напори“ да ги вратат своите граѓани дома. Од тоа не зависи само Пол Вилан.

Кога Еван Гершкович беше уапсен во март, тоа беше прв пат западен дописник да биде обвинет за шпионажа во Москва по Студената војна.

„Еван не е шпион, тој е новинар. Тоа се подразбира“, вели Полина Иванова, дописник на „Фајненшл тајмс“ од Москва и пријателка на Еван.

Повеќе на темава: Животот на уапсениот дописник на „Волстрит Журнал“: Тој ја обожаваше Русија, но таа му го сврте грбот!

Пред неговото апсење, Еван пријавил за последната размена на затвореници меѓу САД и Русија, на Бритни Гринер за Виктор Бут. Пред тоа, поранешниот американски маринец Тревор Рид беше заменет за руски трговец со дрога.

Значи новинарот знае како функционира ова. Но, тој ќе ја знае и високата цена што Русија ја бара за каков било договор. А неговите услови стануваат уште построги.

Пол Вилан вели дека Москва сега сака осуден убиец на ФСБ да се врати од Германија како дел од каква било размена. Кога на Вадим Красиков му беше судено во Берлин, судијата го нарече убиството што го изврши во парк во центарот на градот акт на „државен терор“. Убиецот е осуден на доживотен затвор. Ако Москва е сериозна, тогаш САД треба да ја вовлечат Германија во своите преговори.

Германскиот политичар Родерих Кизеветер вели дека Вашингтон има значително влијание врз Берлин, бидејќи Германија е „многу зависна“ од американските разузнавачи – како што тој ги нарекува „навестувања и совети“.

Минатата недела Владимир Путин истакна дека секој договор што Русија го прави за враќање на Американците мора да биде „взаемно прифатлив“. Тоа може да биде навестување дека преговорите би можеле да се интензивираат. Или можеби не.

„Немам поим што мисли Кремљ, само знам дека мојот најдобар пријател е во затвор, а тој не треба да биде“, вели новинарката Полина Иванова. „Тој треба да биде дома и треба да работи.

Ниту Пол Вилан не се надева на нешто добро во брзо време. Деновите ги поминува шиејќи работни комбинезони и капи во затворска фабрика и вели дека на ѕидовите на неговата касарна има црна мувла.

Тој вели дека неговиот живот е „уништен“ од неговото апсење. Ја изгуби слободата, работата и домот, а неодамна бил нападнат од друг затвореник. Американската влада вели дека тој „не е заборавен“. Но, неговиот најлош страв е од друга размена, која го исклучува.

„Јас сум крајно загрижен. Со секој случај, мојот случај оди на крајот од линијата. Тие само ме оставија во прашина. И во овој момент, овој момент, тоа е многу загрижувачко“.

Русија го стави во затвор. Но, Пол Вилан вели дека му треба САД да притискаат посилно, за да го вратат дома.