Претседателот на СДСМ и премиер Зоран Заев вечерва имаше средба со жители на скопската населба Илинден, пред кои истакна дека во Берлин се сретнал со германската канцеларка Ангела Меркел и францускиот претседател Макрон и оти ова лето земјава ќе добие датум за преговори со ЕУ.

– Доаѓам од Берлин, по средбите со германската канцеларка Меркел и францускиот претседател Макрон, имаме големи пријатели во Европа, не само што оваа година ќе бидеме дел од НАТО, туку ова лето нашата земја ќе почне преговори и со ЕУ. Да продолжиме по вистинскиот пат. Да ја дигнеме и гордоста на Илинден, и овде да се слави победата, како во целата земја, рече претседателот на СДСМ и премиер Заев.

Тој повика на масовна поддршка на Стево Пендаровски, бидејки, како што рече – доста ни беше од фрустрации, кочници и кризи.

-Доаѓа добро време, донесовме крупни храбри одлуки, ги отворивме перспективите, денес имаме држава загарантирана од цел свет, со признаен македонски народ и македонски јазик од цел свет, на пат сме кон ЕУ и НАТО, тоа значи стабилност, но значи и економски развој. Ни треба претседател кој води заедно и напред. Знам дека ќе го избереме Стево Пендаровски и ќе продолжиме заедно напред, порача  Заев во општина Илинден.