Александар Вучиќ ја започна својата прва работна посета на Норвешка како претседател на Србија, откако пред две недели во Белград се одржа конференција заедно со Норвешка и земјите од Западен Балкан за можностите за инвестирање во обновливи извори на енергија.

Вучиќ претходно најави дека Србија треба да спроведе реформа во енергетскиот сектор и да ги диверзифицира изворите на снабдување со гас и нафта, како и да ги зголеми инвестициите во обновливите извори на енергија и дека Норвешка, која е еден од лидерите во таа област и зелената транзиција, ќе и помогне во тоа.

-Министерката Дубравка Ѓедовиќ имаше свои разговори, вечерва имаме средба со компании и советници заинтересирани да помогнат или да инвестираат во нашата земја, кај сите соговорници видов огромен интерес за решавање на енергетските проблеми не само во Норвешка, туку и во Европа, во Западен Балкан и разговаравме како заеднички да ги решиме проблемите во регионот, рече Вучиќ.

Тоа се, додаде, прашања како да се обезбеди напредок и големи инвестиции, како да се инвестира во обновливи извори на енергија, да се направат почисти водата и воздухот.

„Не се прашања за еден ден, туку за годините пред нас, посочи Вучиќ и наведе дека за повеќе обновливи извори на енергија потребно е да се обезбеди рамнотежа, да се градат хидроцентрали. Ќе мораме да преземеме тешки мерки за да се обезбедиме не за оваа зима, туку за другите зими, рече Вучиќ и додаде дека проблемите во енергетскиот сектор на Србија не се „прашање само за нафтата и гасот, туку за целата далноводна мрежа”.

Според Вучиќ норвешки Ристад кој е најдобриот тим во светот понудил три решенија, кои повлекуваат големи промени во јавните претпријатија и дека првите чекори ќе се болни.

Тој посочи дека само за една од српските четири или пет главни компании во енергетската сфера Норвежаните рекле дека не е потребна промена на раководството, додека за сите други рекле дека треба да се сменат луѓето, со лица со поинаков начин на размислување и додаде дека на Норвежаните им понудил „да испратат еден од нивните луѓе да има извршна функција”, без да прецизира во кое јавно претпријатие.

Министерката за рударство и енергетика Дубравка Ѓедовиќ во Осло се сретна со државниот секретар во Министерството за нафта и енергетика на Кралството Норвешка, Андреас Бјеланд Ериксен и директорот на Дирекцијата за вода и енергија, Кјетил Лунд.

„Нашата прва цел, на која работиме со норвешките партнери, е стабилизирање на енергетскиот систем во следните две години. Во оваа смисла, со огромни напори веќе се видливи одредени добри резултати. Втората цел е среднорочна, планирање на енергетската транзиција на тој начин што до 2030 година во системот ќе имаме повеќе обновливи извори на енергија, од ветерни, соларни и хидро капацитети. Третата и последна е декарбонизацијата на енергетскиот сектор и стабилноста на енергетскиот систем до 2050 година, изјави Ѓедовиќ, соопштија од ресорното министерство.