Врховниот суд на Израел денеска ја разгледа петицијата против законот кој го штити израелскиот премиер Бенјамин Нетанјаху од импичмент поради тврдењата дека е во конфликт на интереси бидејќи му се суди за корупција.

Во март годинава со амандман Владата на Израел ги ограничи условите под коишто прмиерот може да биде прогласен за неспособен и да биде остранет од должноста. Подносителите на тужбата, кои ја имаат поддршката на главниот обвинител, сакаат повлекување на овој амандан, тврдејќи дека Парламентот ги злоупотребил своите овластувања со тоа што лично го прилагодил амандманот, за на Бенјамин Нетанјаху да не може да му се суди во предметот во кој тој е обвинет за корупција.

На Нетанјаху му се суди за измама, нарушување на довербата и поткуп во три одделни случаи.

Врховниот суд заседаваше во време кога израелскиот лидер и неговите сојузници се обидуваат да донесат низа закони за реформи во правосудството кои имаат за цел да го ослабат судот и да и дадат контрола на владејачката коалиција врз назначувањето на судиите.

Не е познато кога судот ќе ја соопшти одлуката за претставката. Планот за реформи во правосудството предизвика повеќемесечни протести во поделената земја.