Според податоците на Државниот завод за статистика, индексот на трошоците на животот во мај 2019 година, во однос на претходниот месец, изнесува 100.5, а индексот на цените на мало 100.4.

Пораст на индексот на трошоците на животот во мај 2019 година, во споредба со претходниот месец, е забележан кај свежото и разладеното овошје за 3.7 %, лебот за 1.6 %, другите прехранбени производи за 1.1 %, цигарите за 1.0 %, лебот и житата за 0.9 %, месото за 0.6 %, брашното и другите жита за 0.5 %, замрзнатиот зеленчук освен компирите и другите коренести плодови, шеќерот, џемот, медот, чоколадата и кондиторските производи, алкохолните пијалаци за 0.3 % и маслото и маснотиите за 0.2 %.

Во мај 2019 година, пораст на индексите на трошоците на животот исто така е забележан и кај течните горива за домаќинствата за 5.5 %, течните горива и мазива како дел од опремата за сопствени сообраќајни средства, туристичките пакет-аранжмани за 3.7 %, обувките за 2.8 %, услугите за сместување за 2.5 %, гасот за домаќинствата за 0.7 %, теписите и другите покривки за под, терапевтските помагала, книгите за 0.5 %, малите електрични апарати за домаќинствата, фотографската и кинематографската опрема и оптичките инструменти за 0.4 %, големите електрични апарати за домаќинствата, автомобилите за 0.3 %, опремата за прием, снимање и репродукција на звук и слики, другите лични предмети неспоменати на друго место за 0.2 %.

Намалување на индексите на трошоците на животот во мај 2019 година, во споредба со претходниот месец, е забележано кај свежиот и разладениот зеленчук освен компирот и другите коренести плодови за 4.6 %, трбушките за 0.9 %, сувото овошје и јаткастите производи за 0.7 %, јајцата за 0.4 %, другите пекарски производи, замрзнатата риба за 0.2 %.

Исто така, намалување на индексите на трошоците на животот е забележано и кај авионскиот превоз на патници за 2.2 %, градините, растенијата и цвеќињата за 1.3 %, информатичката опрема за 0.7 %, дисковите, касетите, дискетите, ЦД-ромовите, филмовите за 0.4 %, стаклените садови, кујнскиот прибор и другата опрема, другите медицински производи, резервните делови и опремата за сопствен превоз за 0.2 %.

Индексот на трошоците на животот во мај 2019 година, во споредба со мај 2018 година, бележи пораст од 1.4 %, а индексот на цените на мало бележи пораст од 1.0 %.