Во случај на недостиг на гас или закана од недостиг, Германија значително или целосно ќе го замени гасот што се користи за производство на електрична енергија со јаглен, соопшто денеска германското Министерство за економија. Електраните на јаглен остануваат на подготвеност, како и електраните на лигнит, кои може да бидат подготвени за работа на краток рок.

Сепак, владата ќе се придржува до главниот план за постепено укинување на производството на енергија на јаглен до 2030 година, соопшти Министерството, истакнувајќи дека се додека електраните останат во состојба на подготвеност, нема да има дополнителни емисии на штетни гасови.

Законите со кои се поставува основата за користење на јаглен и лигнит се во владина процедура.

Според Министерството, гасот сочинувал околу 15 отсто од производството на електрична енергија во Германија минатата година, но тој удел веројатно ќе биде помал во 2022 година. На рускиот природен гас отпаѓа повеќе од половина од германскиот увоз на тој енергенс.