Владата денеска ќе ја одржи 38-та седница
Владата денеска преку видео-конференциска врска ќе ја одржи 38-ма седница, на која, меѓу другото, на разгледување и усвојување ќе биде ставена Предлог-програмата за работа на Владата на Република Северна Македонија за 2021 година.
– На предлог на Министерството за здравство Владата денеска ќе ја разгледа Предлог – Националната годишна програма за јавно здравје во Република Северна Македонија за 2021 година, соопштија од владината прес-служба.
Оттаму посочуваат дека Министерство за труд и социјална политика за дневниот ред на оваа седница ги предложила Предлог-програмата за изградба, опремување и одржување на објекти за социјална заштита и домови за стари лица за 2021 година, како и Предлог-програмата за изградба, опремување и одржување на објекти за детска заштита за 2021 година.
– На денешната седница на Владата е и точката Предлог-годишна програма за финансирање на железничката инфраструктура за 2021 година, како и Бизнис планот на Јавното претпријатие за железничка инфраструктура Железници на Република Северна Македонија – Скопје за 2021 година со Инвестициона програма, наведоа од владината прес-служба.
Владата денеска ќе расправа и по Предлог-програмата за промоција и поддршка на туризмот за 2021 година и за Програмата за работа на Агенцијата за промоција и поддршка на туризмот за 2021 година со финансиски план.
