Викторија Лоба за „Слободен печат“: Што очекува од новата 2021 година, а по што ќе ја памети 2020?
Во пресрет на Новата година, на крајот од „старата“, обично ги сумираме резултатите и извлекуваме одредени заклучоци за следната година. Се потсетуваме на убавите, но и на оние помалку убавите моменти што ги одбележаа претходните 365 дена.
Пандемијата на коронавирусот речиси сите нè запре во новите планови, идеи, желби и надежи. 2020 година за огромното мнозинство од нас, веројатно, барем на моменти, изнесе на површина многу наши тешки емоции и обрасци – страв, загуба, вознемиреност, беспомошност, лутина и сл. Некои од нас оваа 2020 година нè фрли на колена, но истовремено и нè крена, мотивира и охрабри.
Во духот на збогувањето со оваа „пандемиска“ година, познатата македонска пејачка Викторија Лоба се осврна на изминатата 2020 година и на годината која со нетрпение ја очекуваме – 2021.
Викторија Лоба, една од најомилените познати личности, на музичката сцена е присутна од најмалата возраст, уште од 2003 година кога ја претставуваше Македонија на Детската евровизија. Зад неа се многу настапи и награди, таа е и заштитно лице на многу познати брендови, а кога сме кај хуманитарните дејности, се вклучува во секоја кампања од хуманитарна природа и во хуманитарните концерти. Меѓу другото, Лоба преку своите профили на социјалните мрежи, каде што ја следат десетици илјадници луѓе, неретко дава силни пораки.
И таа, како и останатиот дел од светот, се прилагоди да живее во новите услови што ги донесе пандемијата.
Што ја одбележа 2020 година на Вашиот личен план?
– Од мојата перспектива, изминатава година беше тотално непредвидлива и со себе донесе нови досега невидени искуства за мене, верувам и поголемиот дел од популацијата глобално го почувствуваа истото што и јас. 2020 е голем учител и оттука треба да ги извлечеме најважните поуки и лекции. Вака кога контемплирам, доаѓам до спознание кои се најважните лекции што ги научив, а тоа се следниве:
И кога околностите се непожелни важно е да се стремам кон постојана свесност и самореализација, да не се затворам во „школка“ туку напротив да комуницирам, да давам и да примам поддршка, достоинствено да го минам овој период затоа што секако сè е подложно на промени и ова ќе помине.
Многу ми недостигаат сцената и публиката, ми недостигаат луѓето и таа радосна атмосфера, ми недостига музиката и слободата да разменувам љубов на моите настапи, концерти, навистина ми недостига да ги изгушкам сите, но знам дека сето ова е само привремено.
Што очекувате од новата 2021 година?
– Немам посебни очекувања, тоа што ми е навистина голема желба е да се разбудиме сите и поучени од досегашното искуство да погледнеме малку што правиме. Секој еден ако тргне прво од себеси и помисли како може да го подобри квалитетот на сопствениот живот би било прекрасно и многу корисно, тоа е нашата должност сега!