ВИДЕО: Сутјеска ја прекина победничката серија на МЗТ Скопје
Серија на МЗТ Скопје Аеродром од пет победи по ред во АБА2-лигата беше прекината на денешната пресметка на стартот од турнирот во Бања Лука, откако во драматичен и до крај неизвесен меч загуби од Сутјеска со 55:56.
Црногорскиот претставник подобро се снајде во последните 30 секунди, во кои „сино-белите“ влегоа со предност од 55:51, но не ги спречија петте поени по ред со шутеви од тешки позиции на Јован Војиновиќ, помеѓу кои „металците“ не реализираа две слободни фрлања.
Претходно македонската екипа имаше и предност од шест поени (53:47), но тоа не беше доволно за да се радува шести пат по ред во регионалното натпреварување.
Тоа беше еден тврд натпревар, со неколку пресврти во кој пресудни беа поголемиот број загубени топки (21-11) и 10 нереализирани обиди за еден поени (13/23), поради што не беше капитализирана огромната доминација во скокот (46-29).
Немања Милошевиќ со 15 поени и осум скока беше најпрецизен во аеродромскиот состав, додека двоцифрен беше и Адем Мекиќ со 11 поени.
И покрај денешниот исход, МЗТ останува втор на табелата со скор 6-2, пред следната пресметка в среда против српската Војводина (21 часот).