ВИДЕО: Пресврт на Барса против Алавес со двата гола на Левандовски
Фудбалерите на Барселона денеска после пресврт го совладаа Алавес на домашен терен со 2:1, во 13 коло од „Ла Лига“.
Алавес дојде во водство веќе во првиот напад, Омородион ја круниса добрата контра на својот тим и најави дека Каталонците ги чека тешка задача.
Истиот играч во 10 минута имаше убава можност за зголемување на предноста, но шутираше покрај голот. Омородион можеше да се прослави во првото полувреме, откако погоди и пречка.
Барса казни во второто полувреме кога го направи и пресвртот благодарение на погодоците на Левандовски. Полскиот напаѓач најпрвин израмни во 53 минута, а конечниот епилог го постави во 78 минута од пенал.
Играчите на Чави после оваа победа во шпанското првенство се на третата позиција со два бода помалку од Реал Мадрид, а четири од водечката Жирона. Алавес е на 15 место со 12 бодови.