По неуспешниот обид пред шест месеци за смена на лидерот на опозициската ВМРО-ДПМНЕ, Христијан Мицкоски, струи во партијата повторно притискаат за неговото заминување од кормилото. Иницијативниот одбор закажа вонреден конгрес за 28 март во Скопје.

„Ниту времињата се редовни, ниту ситуацијата во која се наоѓа партијата и државата се редовни, така што неминовно се наметнува потребата од вонреден конгрес. ВМРО-ДПМНЕ секогаш била столб кој ја штител Македонија и интересите на граѓаните кои живеат во земјава“, велат од Иницијативниот одбор.

Блиските соработници на лидерот на ВМРО-ДПМНЕ ја оспоруваат ваквата иницијатива. Според нив, конгресот ниту е статутарен, ниту пак има правна основа. Обвинија дека станува збор за политичка иницијатива на група на луѓе кои што имаат за цел да му помогнат на Зоран Заев и да му фрлат гума за спасување.

Централниот комитет на ВМРО-ДПМНЕ на вчерашната седница донесе одлука за оддржување на редовен конгрес на партијата во ноември.

-Ова е добра прилика за прочистување на редовите на ВМРО-ДПМНЕ, последно прочитување помеѓу актуелното раководство, новата енергија и поранешните функционери кои се предводени од Зоран Заев. Централниот комитет за ваква иницијатива заседаваше уште пред неколку месеци и едногласно донесе одлука за отфрлање на ваквата иницијатива и согласно статутарните овластувања кои ги има и согласно членот 29, став 4 од Статутот на ВМРО-ДПМНЕ и овој пат едногласно Централниот комитет се задржа на принципиелно почитување на Статутот и статутарните принципи кои што ги има, велат од партијата.

-Ние како партија се водиме според статутот. Врз основа на статутот разговаравме за претстојниот редовен конгрес и донесовме заклучок тој да се оддржи во ноември. Дел од некои поранешни структури се истрчаа дека ќе прават вонреден конгрес во март. Наш фокус е во средбите со граѓаните и полека подготовка на редовниот конгрес кој ќе се оддржи во ноември. Ние сме демократска партија, секој може да го побара она кое што мисли дека треба да го побара, но задача на партиските тела е да ја носат одлуката, а таа е редовен конгрес во ноември 2021, изјави за Утрински брифинг Владимир Нелоски, претседател на градскиот комитет на ВМРО-ДПМНЕ.

-Во овој момент атмосферата во партијата е одлична, се подготвуваме да се судриме со нашиот вистински противник – СДСМ, додаде Нелоски.

Говорејќи околу пописот, Нелоски вели дека најверојатно сме единствена држава во светот каде пописот не се користи како статистичка операција, туку како политичка.

-Јас не познавам земја во светот каде што мора да има двоен потпис, за тој да биде валиден. Не ја разбирам потребата од власта да ја одбие иницијативата за поништување на Законот за попис. Со ова го покажаа лицето на хибридниот режим. Но тоа не не спречува, ќе собираме потписи во сите градови, населби, маала, вели Нелоски.

-Зошто пописот не беше одржан 2011 треба други да прашате, оние кои во тоа време беа во раководството на партија. Гледаме дека многу земји одложуваат попис и затоа е малку симптоматично зошто кај нас се инсистира. Пописот е насушно потребен, но не во вакви услови, не вака, со двојни потписи. Откако ќе ја завршиме граѓанската иницијатива за собирање потписи, се надеваме дека Власта ќе има слух, доколку пак нема, ние ќе ги повикаме сите граѓани да се попишат, но дополнително и сите граѓани кои се во странство да го направат тоа, и на еден начин ќе имаме повторно ситуација каде нема да можат да се искористат комплетно бројките, бидејќи нема да имаме реална слика на состојбите на терен, вели Нелоски.

Целиот разговор погледнете го во видеото: https://www.youtube.com/watch?v=j4wwDm7ictc