Наполи во шестото коло од најсилното италијанско фудбалско првенство дома со 4:1 го совлада Удинезе. Македонскиот репрезентативец Елиф Елмас настапи од 83 минута како замена за Грузиецот Кварацхелија.

По првото полувреме водеа актуелните шампиони на Серија А со головите на Зиелински од пенал во 19 минута и Осимен во 39 минута на стадионот „Диего Армандо Марадона“ во Неапол. За 3:0 се погрижи Кварацхелија, гостите само намалија преку Самарџиќ (81`), а само 60 секунди подоцна трите бода ги потврди Симеоне.

Лацио со 2:0 со головите на Весино во 56 минута и Ѕакањи во 75 минута на „Олимпико“ во Рим го надигра Торино.

Интер го претрпе првиот пораз сезонава во шампионатот, откако загуби пред своите навивачи со 1:2 од Сасуоло. Непосредно пред крајот на првото полувреме домаќините постигнаа гол преку Думфрис (45+1`). Потоа, во 54 минута израмни албанскиот интернационалец Бајрами, а пресвртот на стадионот „Џузепе Меаца“ во Милано го комплетираше Берарди (63`).

На табелата моментно првото место го делат Интер и Милан со по 15 бодови, Јувентус има 13, на четвртата позиција е Аталанта со 12, а Наполи и Лече имаат по 11.

ВИДЕО: Милан со пресврт до триумф над Каљари во Серија А