Дека и најголемите професионалци имаат трема кога ќе почувствуваат голема одговорност, доказ е токму Ремзи, кој не крие дека бил преплашен и од најситната грешка при приготвувањето на јадењата.

Познатиот британски готвач и водител Гордон Ремзи во емисијата „Шоуто на Кели Кларксон“ раскажал како готвел за рускиот претседател Владимир Путин.

Ремзи изјавил дека многу се плашел да не направи грешки и да не ја расипе храната што ја подготвува.

– Бев поканет на Даунинг стрит за време на средбата меѓу Тони Блер и претседателот Путин. За малку ќе умрев од страв – рекол готвачот.

Ремзи изјавил дека повеќе од вообичаено се грижел за квалитетот на јадењата што ги подготвувал, и како што рекол, се вознемирил кога лично се сретнал со Путин и со Блер.

– Тоа беше неверојатно искуство. Се поздравив и застанав покрај нив, а тие ме прашаа за аспарагус – се присетил Ремзи.

Владимир Путин и тогашниот британски премиер Тони Блер се сретнаа за време на посетата на рускиот лидер на Лондон во 2000 година.