Во рамките од 16 коло во најсилното италијанско првенство во дербито составот на Интер на домашен терен со 1:0 го совлада Наполи. Ова е прв пораз за играчите на Лучано Спалети сезонава во Серија А, остануваат на првото место на табелата со 41 бод, сега само пет повеќе од второпласираниот Милан кој претходно славеше против Салернитана.

Единствениот гол за миланските „нераѕури“ на стадионот „Џузепе Меаца“ го постигна Босанецот Един Џеко во 56 минута по асистенцијата на Димарко. За „наполитанците“ македонскиот репрезентативец Елиф Елмас настапи од 76 минута како замена за Кварацхелија.

Удинезе веќе осум натпревари не знае за победа во првенството, овојпат ги разочара своите навивачи со реми против Емполи (1:1). Уште во третата минута поведе гостинот со голот на Балданци, а домаќините израмнија во 71 минута преку Перејра.

Иако од 79 минута клубот од Удине играше со фудбалер повеќе на теренот, поради вториот жолт картон на Акпа Акпро, тоа не го искористи и на крајот само стигна до реми. Нашиот напаѓач Илија Несторовски за Удинезе играше од 84 минута како замена за Бето, а во 94 минута заработи и жолт картон.

Удинезе е на осмото место со 25 бодови, додека Емполи е на 13 позиција со 18.

ВИДЕО: Не помага ни чудесниот Очоа, Милан ги освои бодовите во Салерно