По нерешените 2:2 во првиот натпревар од четвртфиналето во фудбалската Лига на шампионите, на реваншот одигран во Минхен играчите на Баерн славеа со 1:0 против Арсенал.

Решавачкиот гол го постигна Џошуа Кимих во 63 минута, а фудбалерите на тренерот Томас Тухел се пласираа понатаму со вкупни 3:2.

Акцијата беше по десната страна каде што беше Сане, тој го префрли целиот шеснаесетник и ја испрати топката на левата страна каде беше Гереиро, кој упати перфектен центаршут за Кимих. Останатото е историја, одличен удар со глава за 1:0.

Сане имаше шанса само две минути подоцна, Арсенал беше во голем пад во играта и му требаше освежување од клупата. Веднаш наместо Мартинели и Жоржињо влегоа Тросар и Хесус.

Сепак Баерн и натаму беше поблиску до противничкиот гол, но немаше повеќе возбудувања, па резултатот не се менуваше до самиот крај на средбата.