Најмалку 10 полицајци се уапсени во голема акција против нелегални казина во Косово, пренесува Индекс.хр.

Стотици полицајци учествуваа во рација во селото Карачево на границата со Србија. Полицијата соопшти дека станува збор за најголемата акција од ваков вид на Косово, спроведена по едногодишна истрага.

Косово минатата година го забрани коцкањето за да се сузбие криминалот.

Јетиш Малоку, главен обвинител во покраината Гњилан, изјави за новинарите дека полицијата уапсила најмалку 35 лица осомничени за нелегално коцкање, проституција, трговија со луѓе и поседување дрога и оружје.

Најмалку 10 лица од уапсените се гранични полицајци кои наводно помагале во нелегални активности што се одвивале преку границата меѓу Косово и Србија.

Во акцијата се демолирани 12 илегални коцкарници, а полицијата запленила голем број слот апарати, соопшти полицијата.