У17: Нашите фудбалерки стартуваа со победа на квалификацискиот турнир во Драч
Младата женска репрезентација на Македонија до 17 години успешно ги започна квалификациите во рамките на лигата Б за пласман на Европско првенство 2023 година што ќе се одржи во Естонија.
Во првиот натпревар избраничките на селекторот Катерина Милеска славеа убедлива победа од 5:2 против селекцијата на Албанија на стартот од квалификацискиот турнир.
Младите фудбалерки поведоа во 13 минута со погодокот што го постигна Митковска. Домаќинот на турнирот успеа во 33 минута да го израмни резултатот преку Метоха.
Само една минута подоцна Аго постигнува гол за комплетен пресврт и предност на Албанија од 2:1. Ѓорѓиева во последната минута од првиот дел успеа да погоди за израмнување на предноста.
Во 52 минута Павловска погоди за предност на Македонија. Истата фудбалерка во 72 минута се запиша по вторпат во листата на стрелците, а во 87 минута Василева го постави конечниот епилог.
На 21 октомври ќе го играме вториот меч против Косово, а три дена подоцна ривал ни е репрезентацијата на Молдавија.