Италијанскиот опозициски лидер на десницата Маето Салвини денес изјави дека повеќе не е фан на кремот „Нутела“, откако открил дека чоколадниот крем содржи и лешници од турско потекло, а не италијански плодови, пренесуваат медиумите.

Салвини, кој ја предводи националистичката партија Лига, претходно објавуваше селфиња на социјалните мрежи додека ужива во парчиња леб намачкани со популарниот крем „Нутела“, кој го произведува компанијата „Фереро“. Според пишувањата на „АП“, тој на вчерашниот митинг во градот Равена рекол дека се предомислил во врска со овој производ.

– Дознав дека „Нутела“ користи турски лешници, а јас повеќе сакам да им помагам на компаниите кои користат италијански производи. Повеќе јадам италијански производи и им помагам на италијанските фармери – рече Салвини откако една жена од толпата му понуди сендвич со чоколадниот крем.

„Фереро“ досега не ја коментираа изјавата на Салвини. Италјанската компанија Алба е еден од најголемите светски купци на лешници, но италијанското производство не е доволно за одржување на производството на „Нутела“.

Партијата Лига на Салвини е позната по мотото „Италијанците на прво место“ и ги „брани“ производите кои се направени во Италија.