Струга ќе игра против Есперанж во Скопје на ФФМ Тренинг центарот
Претходно актуелниот македонски шампион Струга Трим Лум објави дека првиот натпревар од третото квалификациско коло од Конференциската лига против Есперанж од Луксембург ќе го игра во Скопје на 10 август од 17.00 часот на Националната арена „Тодор Проески“.
Но, на официјалниот сајт на УЕФА стои дека двете екипи нема да играат на арената, туку на ФФМ тренинг центарот „Петар Милошевски“.
Оваа одлука доаѓа поради лошата состојба на теренот на арената „Тодор Проески“, а тоа најдобро и се виде на натпреварот од Конференциската лига помеѓу Шкупи и Левски, на што се пожалија и Бугарите.
Арената „Тодор Проески“ се затвора до 9 септември кога македонската А репрезентација треба да ја пречека Италија во рамките од квалификациите за Европското првенство 2024.
Претстојниот викенд почнува и новата сезона во Првата лига, и овој месец ниту еден клуб нема да може да игра на нашиот најголем стадион.